Libereco por Nahid Khodajoo!

      Komentoj malŝaltitaj ĉe Libereco por Nahid Khodajoo!

Deklaro de la Kolektivo Konstanta Revolucio (CoReP)

La Kolektivo Konstanta Revolucio (CoReP) kondamnas la reareston de Nahid Khodajoo, longjara aktivulino de la irana laborista movado, sindikatistino kaj eksa politika malliberulino. Ni postulas ŝian tujan kaj senkondiĉan liberigon!

La 6-an de oktobro 2026, sekurecaj fortoj arestis Nahid Khodajoo en ŝia loĝejo en Teherano. Ili traserĉis la loĝejon kaj poste forkondukis ŝin al loko, kiu komence ne estis konigita. Nur la 19-an de oktobro, post ĉirkaŭ du semajnoj sen kontakto kun sia familio, ŝi povis per mallonga telefona konversacio informi la familion, ke ŝi estas tenata en la sanservo-sekcio de la malliberejo Kachouei en Karaj. Ĝis nun la aŭtoritatoj ne publikigis la kialojn de ŝia nova aresto aŭ eventualajn akuzojn kontraŭ ŝi.

Nahid Khodajoo estas membro de la Libera Sindikato de Iranaj Laboristoj (Free Union of Iranian Workers). Dum jardekoj ŝi batalas por la rajtoj de la laboristoj. Ŝi partoprenis sindikatajn kampanjojn por vivtenaj salajroj kaj por la defendo de sociaj rajtoj. Ŝi ankaŭ estas eksa politika malliberulino, kiu jam en la 1980-aj jaroj estis politike persekutata. Ŝia kurda deveno kaj ŝia naskiĝurbo Sanandaj ligas ŝian biografion al popolo, kiu dum jardekoj suferas nacian kaj politikan subpremadon en Irano.

La 1-an de majo 2019, Khodajoo estis arestita dum manifestacio antaŭ la irana parlamento okaze de la Internacia Tago de la Laboristoj. Revolucia tribunalo poste kondamnis ŝin al kvin jaroj da malliberigo pro supozata konspiro kontraŭ la nacia sekureco kaj al plia jaro pro supozata perturbo de la publika ordo. La puno ankaŭ inkludis 74 vipobatojn kaj aliajn punrimedojn. En februaro 2024 ŝi denove estis malliberigita por plenumi la kvinjaran punon. Ŝi liberiĝis nur en septembro 2025. Nun ŝi denove estas en la manoj de la sama subprema aparato, kiu persekutas sendependajn sindikatojn kaj opoziciajn politikajn agadojn.

Tiu ripeta persekutado ne estas izolita okazaĵo. La reakcia teokratia reĝimo de Irano subpremas sendependajn sindikatojn, strikantajn laboristojn, virinojn, naciajn minoritatojn kaj politikajn opoziciulojn. Ĝi provas malhelpi ĉian sendependan organiziĝon de la laborista klaso kaj silentigi tiujn, kiuj rezistas ekspluatadon, senrajtigon kaj arbitraĵojn de la ŝtato.

La defendo de Nahid Khodajoo estas do tasko de la internacia laborista movado. Ni alvokas sindikatojn, laboristajn organizaĵojn, komunistajn partiojn kaj homrajtajn organizaĵojn postuli ŝian liberigon, diskonigi ŝian kazon internacie kaj protesti kontraŭ la daŭra persekutado de sendependaj sindikatistoj en Irano.

Nia solidareco estas kun Nahid Khodajoo kaj kun ĉiuj, kiuj estas persekutataj kaj malliberigataj pro sia batalo por la rajtoj de laboristoj, la emancipiĝo de virinoj, la rajtoj de la kurda popolo kaj de aliaj subpremataj loĝantaroj, kaj politikaj liberecoj.

Libereco por Nahid Khodajoo!

Libereco por ĉiuj politikaj malliberuloj en Irano!

For kun la reakcia teokratia reĝimo kaj ĝia subprema aparato!

Vivu la internacia solidareco de la laboristoj!

Kolektivo Konstanta Revolucio (CoReP)